O CPEIG organiza un seminario de presentacións con distintos slideware
mércores, 4 de abril do 2012
Coa cultura visual que temos hoxe en día, intentar
saír con éxito dunha presentación calquera que fagamos sen térmonos apoiado en
material audiovisual ou simples esquemas para que a audiencia nos siga, é case
que unha odisea por atractivo que sexa o tema a tratar.
O mesmo ocorre se o que facemos é botar man
dun lote de diapositivas cheas de texto e nos limitamos a reproducir todo o que
a audiencia pode ir lendo na pantalla do proxector: o fracaso en ámbolos dous
casos está case asegurado.
O Colexio Profesional de Enxeñaría en
Informática de Galicia (CPEIG), sabedor da importancia que adquiriron estas ferramentas
que fan atractivas as presentacións e da mala fama que colleron polo mal uso
que delas se fan, (falamos de programas como por exemplo o PowerPoint ou outros
slideware), está a organizar un seminario
formativo neste tipo de programas, que se levará a cabo na Escola Galega de
Administración Pública (EGAP), en Santiago de Compostela.
O obradoiro, que leva por nome A Arte da Presentación, terá lugar o
sábado 21 de abril, e vai dirixido a aquelas persoas interesadas en mellorar as
súas presentacións perante audiencias botando man de software axeitado ás súas
necesidades.
Os
encargados de impartir o seminario serán Eduardo de la Fuente e Alberto de
Vega, da empresa Presentaciones Artesanas, ámbolos dous recoñecidos
profesionais de referencia na materia, que procurarán que as persoas asistentes
aprendan as destrezas necesarias para que as súas presentacións sexan
atractivas dabondo e conecten coa audiencia, evitando que esta caia no
aburrimento.
As
persoas interesadas en asistir á xornada formativa deberán pagar unha cota de
50 euros, mentres que os colexiados e colexiadas do CPEIG poderán asistir ingresando
30 euros.
En
palabras dos organizadores do seminario, “a
sesión formativa quere evitar a morte por PowerPoint”, ao que engaden, “expresión que resume de xeito maxistral o
estado de aburrimento e fatiga inducido polo exceso de información amosado nas
típicas presentacións de empresa”. Para que isto cambie, a organización
recomenda apuntarse ao seminario e descubrir que “ existe outra forma de entender as presentacións e conectar coa túa
audiencia”.