O Goberno galego activa a canle de contacto dos cidadáns cos seus delegados de protección de datos
venres, 25 de maio do 2018
Para quen non o saiba, aínda que a estas alturas
calquera internauta tivo unha manchea de oportunidades para que llo
lembrasen (con avalancha de correos recordatorios incluída) esta
sexta feira (venres 25 de maio) entra finalmente en vigor o novo
Regulamento Xeral de Protección de Datos persoais (RXPD, regulamento
UE 2016/679). A cuestión está a xerar certezas e dúbidas, pero no
que estamos todos de acordo é na relevancia do acontecemento. Para
botarnos unha man no que se refire aos detalles do regulamento, en
palabras da axencia AMTEGA “o máis esixente nesta materia” (con
novos dereitos para o cidadáns pero con obrigas e compromisos firmes
para entes públicos e privados no relativo á xestión da
información persoal), o
Goberno galego activou a canle de contacto dos cidadáns cos
delegados de Protección de Datos da Administración autonómica.
En detalle, e tendo en conta que un dos
requirimentos da nova normativa baséase en que as administracións
públicas conten coa figura do delegado de Protección de Datos (un
valedor do cidadán neste ámbito), a Xunta conta xa cun experto en
privacidade e lexislación destas características por conselleira e
máis un na Axencia para a Modernización Tecnolóxica de Galicia
(AMTEGA), que exerce labores de coordinación. Ademais, poderá haber
delegados noutras entidades do sector público autonómico, a
proposta da Consellería correspondente. Estes profesionais, segundo
informa a axencia, actúan como garantes do cumprimento do RXPD,
informando, asesorando e supervisando o cumprimento do regulamento
europeo de protección de datos.
Os cidadáns que desexen poñerse en contacto os
delegados poderán facelo a través do portal da Xunta,
www.xunta.gal. no espazo
específico sobre a protección de datos persoais na Administración
autonómica
https://www.xunta.gal/informacion-xeral-proteccion-datos..
Novidades
para os
cidadáns
A axencia que dirixe Mar Pereira aproveitou a
véspera deste 25 de maio para facernos ao día das transformación
que pon en xogo a normativa. Unha das novidades que percibirán os
cidadáns coa entrada en vigor do novo regulamento é que tanto
empresas como administracións teñen que identificar as finalidades
e a base xurídica dos tratamentos que levan a cabo. Ademais, os
organismos públicos teñen que facilitar procedementos para que os
cidadáns “dean un consentimento inequívoco na cesión dos seus
datos”. Por certo que desaparece o consentimento tácito e aparecen
novos dereitos para os usuarios de novas tecnoloxías, como por
exemplo a mención expresa ao dereito ao esquecemento.
Igualmente, deberán adaptar os documentos que
actualmente se empregan para recoller os datos, facéndoos
concisos, transparentes e accesíbeis para toda a sociedade. Outra
das modificacións que esixe a normativa radica na información que
se dá aos interesados, que incorpora elementos adicionais ao
requirido ata o momento como, por exemplo, a necesidade de informar
sobre o prazo de conservación dos datos.
Segundo engade AMTEGA, arestora a Xunta está a
revisar os formularios asociados a procedementos administrativos e
servizos ofrecidos, incorporando aos novas esixencias de información
sobre o tratamento de datos persoais. Asemade, estanse a someter ao
mesmo proceso de estudo as cláusulas de protección de datos nos
pregos de contratación pública así como en outros tipos de
encargos de tratamento de datos persoais. Igualmente, atópase en
preparación un procedemento normalizado para a atención dos
dereitos no ámbito de protección de datos, que se poderán tramitar
na Sede Electrónica e nas Oficinas de Rexistro e Información.