Vitae organiza en outubro a 3ª edición do seu curso sobre resolución de conflitos na empresa

A consultora tecnolóxica Vitae vai organizar neste arrinque do outono a terceira edición dunha actividade formativa que nos proporciona recursos para garantir un bo ambiente de traballo. Trátase do Curso Resolución de Conflitos, que se desenvolve a través do formato de aula virtual os días 23, 24 e 26 de outubro.
Ao longo de nove horas de formación (que se deben completar con outras 81 mediante preparación, lecturas e investigación), mostraranse exemplos concretos de problemáticas laborais e amosaranse xeitos de evitalas e resolvelas, ao tempo que se achegarán respostas e claves para boa parte das preguntas que nos asaltan ao tratar a cuestión dos conflitos laborais.
“Este seminario”, informou a consultora galega Vitae, “pretende facer un percorrido sobre os elementos máis importantes do conflito, sendo o seu obxectivo principal axudar aos participantes a entender e xestionar mellor os desencontros persoais ou profesionais que deban abordar no seu día a día”.
O seminario basea o seu alicerce tecnolóxico nos conceptos de Formación Activa e Student Centred Learning. “Ambas estratexias pedagóxicas”, engade Vitae, “requiren da participación activa do estudante como método de aprendizaxe baixo as instrucións do formador, cuxo rol é o de dinamizador, impulsor de criterio e de significado e significantes”. Noutras palabras, “o grao de aprendizaxe do alumno dependerá da súa implicación persoal activa no proceso”.
Os obxectivos concretos do curso son os seguintes:
-Dotarnos dun rol de liderado e proactivo na resolución de conflitos.
-Mellorarmos a eficiencia e a eficacia persoal e organizativa e xestionar mellor os desencontros entre membros do noso equipo.
A persoa encargada de impartir o curso será Javier Rovira, licenciado en Dereito e Administración de Empresas polo ICADE, mestrado en Dirección Xeral polo IESE e Doutorado en Economía de Empresa (DEA pola Universidade Rei Xoán Carlos). Foi profesor da ESIC Business & Marketing School e é socio director de Know How NP, consultora especializada en estratexia de innovación e desenvolvemento organizativo, tendo unha dilatada experiencia en diferentes sectores. Foi director xeral de González Byass, director xeral de Neck & Neck, conselleiro delegado de Sabelma, director de Laboratorios Babé e director de Marketing e Desenvolvemento Estratéxico de Bebidas Pepsico. Coo consultor e formador traballou con empresas como Microsoft, Terra, Monsanto, Prisa, Axencia Tributaria, Telefónica, RENFE, Dell España, Lucent, El Corte Inglés ou Porche-Saab España, entre outras moitas. Ten no seu haber unhas 10.000 horas de consultoría e unha bagaxe formativa de máis de 5.000 profesionais e directivos.