Telefónica achega 900.000 euros para axudar ás vítimas de Haití

Mentres algunhas entidades bancarias ven incrementar os seus beneficios grazas ás doazóns dos cidadáns e mentres os cruceiros para xente podre de cartos seguen a empregar a contorna de Haití para proseguir a festa, un novo sismo vén de sacudir o país coma se non houbese maneira posible de pechar a ferida. Con todo, cómpre lembrármonos a nós mesmos que hai xeitos de colaborar e que para iso están os trebellos con acceso ás redes que temos ao alcance da man. Se o outro día falabamos nesta mesma web das canles habilitadas por Yoigo e Orange, agora toca facelo de Telefónica e Vodafone, que, cada unha á súa maneira, están a tentar que as mensaxes de texto sirvan para algo máis que para picar co novo calote telefónico-amoroso.
Pois ben, se Vodafone segue a diante co seu número 5280 (ao que teremos que enviar un sms coas letras CR e co obxectivo de doar axuda á Cruz Vermella por valor de 1,04 céntimos a mensaxe), Telefónica xa anunciou que achegará 900.000 euros para contribuír á reconstrución do país tralos devastadores terremotos destes días.
A compañía, sinala nun comunicado, faralle chegar á dita organización esta cantidade co obxectivo de cubrir proxectos destinados á nenez, con especial fincapé na saúde. A achega conseguiuse a través das tres divisións territoriais da compañía: Telefónica España, Telefónica Europa e Telefónica Latinoamérica. Por certo que a tarefa solidaria está a vir acompañada dun traballo de reconstrución das comunicacións. Segundo fai saber a firma no dito comunicado, Telefónica restableceu “en cuestión de poucas horas as comunicacións instantáneas internacionais (voz, datos e televisión) con Haití grazas ao seu servizo BGAN de telecomunicacións vía satélite, tal como se fixo noutras situacións de emerxencia como o secuestro do barco Alakrana no Índico”.