O Polo Aeroespacial impulsará a compra privada de innovación para os retos das firmas tractoras do sector
venres, 31 de marzo do 2023
O
Polo Aeroespacial de Galicia vén de dar un novo paso adiante no seu
camiño de ser un referente mundial en materia de industria
aeronáutica e UAV. Estamos
a falar de dúas convocatorias (2023 e 2024) de Compra Privada de
Innovación, na que as pemes e centros tecnolóxicos galegos
formarán consorcios para dar resposta aos retos e necesidades
tecnolóxicos das empresas tractoras do sector. Os detalles das
convocatorias foron achegados en Madrid polo conselleiro de Economía,
Francisco Conde, e a directora da Axencia Galega de Innovación
(GAIN).
Dotadas
con 11,7M€ (con co-financiamento por parte do sector privado) estas
dúas novidades permitirán “estender o ámbito de actuación do
Polo colaborando no desenvolvemento tecnolóxico do sector”,
sinalou Conde, salientando que esta nova figura seguirá permitindo
que o Polo continúe “xerando pegada industrial”.
Así,
dixo, “xunto co talento, coñecemento e capacidades que existen en
Galicia neste eido, trabállase no deseño de solucións que se
poidan fabricar, ofrecer e comercializar desde Galicia”.
Encontro
en Madrid
Conde
participou nun encontro en Madrid no que se presentaron os programas
de I+D dos novos socios estratéxicos do Polo Aeroespacial de
Galicia: Airbus, Avincis e Telespazio. Con estas empresas estase
traballando para poder levar o uso de vehículos aéreos non
tripulados a novos servizos como a prevención de incendios, a
vixilancia pesqueira ou a atención sanitaria.
O
vicepresidente económico puxo en valor a colaboración
público-privada, “xa que é un dos puntos fortes no impulso do
Polo Aeroespacial de Galicia”, dixo, referíndose tamén ao
compromiso da Administración galega con este sector poñendo á súa
disposición o maior marco de incentivos a través da compra pública
de innovación, a compra pública precomercial e agora a compra
privada de innovación.
O
obxectivo dos instrumentos postos en marcha, engadiu, é “o
desenvolvemento de tecnoloxías no eido aeroespacial que permitan
resolver retos tanto do sector como da Administración pública á
hora de prestar os seus servizos á cidadanía”.
Desde a posta
en marcha en 2015 desta estratexia, xa se mobilizaron preto de 500M€
de investimento público-privado (330 nesta segunda fase). Neste
sentido, Conde considerou fundamental contar co apoio do Goberno a
través dos fondos europeos para que as empresas “poidan
desenvolver máis programas co reto de que estes fondos teñan un
impacto na transformación do tecido industrial”.
Na
súa intervención, Conde puxo en valor a importancia que este Polo
está tendo na xeración dun verdadeiro ecosistema empresarial no que
as compañías tractoras están tendo, tamén, un papel fundamental.
Así, 70 pemes e centros de coñecemento están creando tecnoloxía
propia no segmento aeroespacial actualmente en Galicia.