O Concello de Bueu activa a súa Oficina Virtual Tributaria
mércores, 11 de xullo do 2018
O
Concello
de Bueu vén de activar un servizo tecnolóxico para facilitar ao
máximo os pagamentos da cidadanía, tanto a nivel de axilización
dos trámites como de comodidade e seguridade. Estamos a falar da
Oficia Virtual Tributaria (OVT) local, un portal para que permite
aboar taxas a través da Rede e cuxa posta en marcha coincidiu co
comezo do período de cobranza do Imposto de Bens Urbanos (IBI) que
se abriu o pasado 29 de xuño e que estará dispoñíbel até o 31 de
agosto. O principal requirimento para usar esta canle é introducir o
DNI e a referencia de cobro no apartado Pagar os meus recibos
habilitado na web oficial do Concello, www.concellodebueu.gal.
Segundo
salientou Félix Juncal, alcalde de Bueu, unha das principais
características do servizo é que se trata “dunha ferramenta que
fomenta os mecanismos de acceso aos trámites tributarios e reduce os
tempos de agarda”. Esta mellora súmase á recente renovación da
páxina web municipal, coa que “continuamos impulsando a
participación cada vez máis activa da cidadanía na
administración”, subliñou o rexedor.
Porén,
as posibilidades da OVT non rematan no devandito e son “moito máis
amplas”. Por exemplo, permiten acceder (mediante certificado
dixital) á conta tributaria co Concello, dende a que poderán
realizar operacións como as seguintes: os seus valores en
voluntaria, executiva ou os que estean incluídos nun expediente de
constrinximento, expedientes de xestión, bens que constitúen
obxectos tributarios, localización na cartografía oficial do
Catastro, domiciliación dos recibos, alta de autoliquidación de
vehículos, pagamento de recibos, modificación dalgúns datos
persoais, consulta de recibos anulados, xustificante de recibos
pagados, impresión de documentos cobratorios ou identificación de
condutor en sancións de tráfico.